Presentación del primer númberu de Formientu. Arribada, Xixón (ochobre 2006)

Formientu “revista de lliteratura mui moza” ye una revista lliteraria que busca espublizar la obra de los autores más mozos de la lliteratura asturiana y dala a conocer.

Formientu ñació nel añu 2006 dirixida por Inaciu Galán y embaxo la edición de Xareos! y dende entós vien espublizándose con regularidá, axuntando a los escritores más mozos del panorama asturianu d’anguaño.

Recital de los autores de Formientu n'Alborá Llibros, Xixón

Alredor de la revista Formientu, Xareos! vieno organizando nos últimos años recitales, presentaciones y alderiques en munchos de los conceyos d’Asturies, destacando la participación d’esta revista nos actos de la XXVIII Selmana de les Lletres Asturianes, en 2007, pa la que s’espublizó un númberu especial dedicáu a la narrativa más moza.

En 2008 Xareos! Xestión Cultural y la editorial La Cruz de Grau roblaron un alcuerdu pol que la editorial s'encarga del llabor técnicu y distribución. Coincidiendo col alcuerdu, Formientu estrenó un Conseyu de Redaición fixu pa da-y a la revista una llinia lliteraria más clara y de calidá. El Conseyu ta formáu pol escritor Benxa Pérez y l'editor César García, coordinaos pola escritora y filóloga Laura Marcos.