Valen pa cambiar el llugar d’un alcuentu, comunicar la nota d’un esame a un compañeru, pero tamién pa contar lo que nun nos atrevemos a dicir a la cara o pa comunicase con un amante delantre d’el llexítimu o llexítima ensin que s’enteren; y de fechu sirven de prueba en casos d’infidelidá o amenaces.. El mensaxe curtiu o SMS ye dende hai unos años un tipu de testu cotidianu nes nuestres vides; y pue que sía hasta l’únicu tipu de testu que les xeneraciones más moces redacten y remanen con más remangu que les más madures. En Formientu, faciendo gala del nuestru espíritu innovador queremos convidar nesta ocasión a los escritores que (probablemente) más empleguen estos mensaxes a que-yos dean una vuelta lliteraria a los 160 caracteres que los formen, intentando encerrar nes poques frases que caben na pantalla d’un teléfonu móvil toa una historia onde s’intuyan dos o más personaxes y un puntu d’inflexón na relación ente ellos. Asina pues el lema del concursu ye que presentamos ye “¡Si nun llego a recibir aquel SMS…!” y mandaráse de les bases que vienen darréu.

BASES:

1. Podrá participar nel concursu cualesquier persona nacida a partir del añu 1975.

2. Cada autor podrá unviar tantes participaciones al concursu como-y pete.

3. Cada testu tendrá como muncho los 160 caracteres de los mensaxes SMS.

4. Los testos tarán redactaos en llingua asturiana y podrán mandase de les abreviatures típiques que s’empleguen nesti tipu de mensaxes, asina como prescindir d’espacios y signos de puntuación, anque s’encamienta a los autores que miren porque’l mensaxe seya entendible pa los más de los llectores.

5. Los rellatos han unviase al corréu lletrónicu formientu@xareos.com unviando los datos personales (nome, teléfonu, dirección y curriculu curtiu) nun archivu axuntáu al corréu.

6. D’ente los rellatos recibíos van otorgase trés premios (compuestos por un llote de llibros y la espublización del rellatu na revista Formientu) y un númberu ilimitáu d’accésits, que van espublizase na revista. El xuráu podrá encamentar la espublización d’otros rellatos.

7. El certame pue quedar ermu.

8. Participar nel certame supón aceptar les presentes bases.

9. El plazu ta abiertu hasta'l miércoles 6 de xineru de 2010.